Tingkagol karon sa detention facility sa Digos City Police Station ang usa ka 30-anyos nga inahan human matud pa mipatay sa iyang usa ka bulan pa lamang nga anak nga lalaki alas 11:45 sa buntag kagahapong adlawa sulod sa ilang balay sa Purok Adelfa, Barangay Tres de Mayo, Digos City.
Naila ang suspek nga si alyas“Lyn,” kanhi guest relations officer ug adunay live-in partner.
Sumala kang PCMS Hernan Blantucas, investigator-on-case, usa ka silingan ang nakadungog sa kusog nga paghilak sa bata ug miadto sa balay sa suspek aron tan-awon ang nahitabo. Didto niya nasaksihan nga gituok sa inahan ang bata samtang gisap-ongan ang ilong ug baba niini.
Gisulayan sa silingan nga pugngan ang suspek apan wala kini magmalampuson, maong nangayo siya og tabang sa ubang kasilinganan. Sa ilang pagbalik sa sulod sa balay, nakita pa nila nga gibunal-bunal sa suspek ang bata sa katre sa makadaghang higayon.
Matud ni Blantucas, nakaplagan nga adunay grabeng samad sa ulo ang bata ug nabuak ang “skull” niini. Gikaingon usab nga ang suspek, gilabay ang lawas sa bata ngadto sa basurahan human sa insidente.
Nisulay og sibat ang suspek apan napugngan kini sa mga kasilinganan hangtod nga miabot ang kapulisan ug nadakpan kini.
Dugang pa sa imbestigador, base sa ilang nakuhang impormasyon gikan sa mga silingan, giingong naggamit sa iligal nga droga ang suspek, apan padayon pa kini nga gisuta sa mga awtoridad.
Sa inisyal nga imbestigasyon, nasayran usab nga naglalis ang suspek ug ang iyang live-in partner kagahapon sa buntag. Giingong gusto sa suspek nga magpapalit og beer apan misupak ang iyang kapuyo ug gipili nga palitan siya og Yakult ug biskwit. Tungod niini, giingong nasuko ang suspek.
Mibiya ang iyang live-in partner aron mangita og manghihilot, apan sa iyang pagbalik sa balay, patay na ang ilang anak.
Sa pagkakaron, nagpabiling hilom ang suspek ug wala pa maghatag og pahayag ngadto sa kapulisan. Gikatakdang pasakaan siya og kasong parricide.
