Gipahibalo sa International Criminal Court (ICC) Trial Chamber III ang mga lagda ug iskedyul sa pagpadayon sa kaso batok kang kanhi Pangulong Rodrigo Duterte nga giakusahan og krimen batok sa katawhan.
Sumala sa ICC, sugdan ang pagbasa sa mga kaso sa pagsugod sa trial sa Nobyembre 30, 2026.
Sa dili pa kini, kinahanglan isumite sa prosekusyon hangtod Agosto 31 ang ilang trial brief, listahan sa mga testigo, ug mga ebidensyang ipresentar. Ang mga legal nga representante sa mga biktima mahimong mosumite usab og trial brief hangtod Septiyembre 28.
Ang kampo ni Duterte adunay hangtod Oktubre 30 aron isumite ang ilang mga tubag ug depensa batok sa mga alegasyon.
Sa pagsugod sa husay, una nga mopahayag ang prosekusyon, sundan sa mga representante sa mga biktima, ug dayon sa depensa. Ang pagpresentar sa ebidensya himuon sa tulo ka hugna: para sa prosekusyon, mga biktima kung tugotan sa korte, ug sa depensa.
Giklaro usab sa ICC nga ang depensa adunay katungod sa pagpangutana sa mga testigo ug mahimong maoy katapusang mopangutana kon gikinahanglan.
Gimando usab sa korte ang prosekusyon nga mangayo og mga lakang aron maprotektahan ang ilang mga testigo sa sulod sa korte.
Si Duterte anaa sa kustodiya sa ICC sukad Marso 2025 tungod sa mga alegasyon sa pagpatay atol sa iyang termino isip mayor sa Davao City ug sa kampanya kontra droga sa panahon sa iyang pagkapresidente.
Photo Courtesy: GMA
