Gilauman ang dakong rollback sa presyo sa mga produktong petrolyo karong semana, sumala sa Department of Energy (DOE), human sa paghinay sa tensyon tali sa Estados Unidos ug Iran.
Base sa banabana sa DOE, mahimong mokunhod og P4 hangtod P5 kada litro ang gasolina, P8 hangtod P10 kada litro ang diesel, ug P9 hangtod P11 kada litro ang kerosene.
Matud ni DOE Oil Industry Management Bureau Director Rino Abad, positibong timailhan ang pag-uswag sa relasyon sa US ug Iran nga makatabang sa pagpaubos sa presyo sa lana sa merkado sa kalibutan.
Bisan pa niini, giingon sa DOE nga dili pa dayon mobalik sa P50 hangtod P60 kada litro ang presyo sa mga produktong petrolyo sama sa wala pa mosaka ang tensyon sa Middle East. Posible lamang nga mosibog kini sa P60 hangtod P80 nga presyo depende sa kalamboan sa sitwasyon.
Samtang, naglaom ang mga drayber sa pampublikong sakyanan nga makatabang dako kanila ang rollback tungod sa taas nga gasto sa krudo. Naglaom usab ang mga pasahero nga kung moubos ang presyo sa gasolina ug diesel, moubos usab ang plete ug presyo sa pipila ka batakang palaliton.
Photo Courtesy: IBON Foundation
