Magpulong karong Mayo ang mga economic managers sa administrasyon aron susihon pag-usab ang growth ug fiscal targets sa nasud, matod ni Arsenio Balisacan, kalihim sa Department of Economy Planning and Development.
Giingon ni Balisacan nga buhaton ang review human sa pagpagawas sa economic performance report, nga gilauman karong sunod semana. Ang Philippine Statistics Authority mopagawas sa first-quarter growth data karong Mayo 7, ug posibleng motapok ang Development Budget Coordination Committee usa ka semana human niini.
Sa miaging target, 5% hangtod 6% ang growth projection karong tuig ug 5.5% hangtod 6.5% sa 2027.
Apan giila ni Balisacan nga naapektuhan ang outlook tungod sa pagsaka sa presyo sa lana ug tensyon sa Middle East, nga bug-at sa Pilipinas nga nagsalig sa imported fuel. Matod niya, samtang nagabangon pa gikan sa mga isyu sa imprastruktura, nadugangan pa og bag-ong hagit ang ekonomiya.
Bisan pa niini, gipunting sa gobyerno ang pagpanalipod sa mga apektadong sektor ug pagpadayon sa economic recovery human sa krisis.
Photo Courtesy: PNA
