Nawad-an na og pasensya ang usa ka grupo sa mga mag-uuma tungod sa hinay nga aksyon sa Department of Agriculture (DA) bahin sa pag-apod-apod sa ayuda nga abono.
Sumala ni Raul Montemayor, national manager sa Federation of Free Farmers Cooperatives, Inc. (FFFCI), magsugod karong Mayo ang pagtanom og humay, apan hangtod karon nangayo pa lang og pondo ang DA para sa biofertilizer.
Matod pa niya, basin mahuman nalamang ang panahon sa pagtanom dili pa moabot ang maong tabang.
Dugang pa nga karon pa lang gikompirmar sa DA nga nangayo kini og 30 bilyon nga dugang pondo para sa fertilizer ug subsidy para sa mga mag-uuma.
Dungan niini, gipatuman na usab ang ₱10 bilyon nga Presidential Assistance for Farmers and Fisherfolk Program (PAFFP) aron matabangan ang mga mag-uuma ug mananagat atubangan sa mahal nga gasto sa produksyon.
Base usab sa impormasyon gikan sa DA, mikunhod ang projection sa lokal nga produksyon sa bugas gikan sa 20.8 million metric tons ngadto sa 19.8 million metric tons karong tuiga.
Gilauman pa nga mokunhod pa kini tungod sa epekto sa energy crisis ug kakulangon sa abono. Tungod niini, nanawagan ang mga mag-uuma nga paspasan na sa gobyerno ang paghatag sa biofertilizer aron dili maapektuhan ang ilang ani ug kinitaan.
Photo courtesy:Adobe
