Patay ang tulo ka bata samtang duha ang gidala sa balay tambalananan human ang usa ka masulub-on nga insidente sa pagkalumos niadtong Miyerkules, Abril 29,2026 nga nikalas sa kinabuhi sa tulo ka mga menor de edad sa baybayon sa Purok Dona Nicolasa, Barangay Mabua, dakbayan sa Tandag.
Base sa report, ang mga biktima naglangkob sa lima ka mga bata nga nag-edad og 8 hangtod 15 anyos. Inisyal nga nasayran nga nalingaw og langoy ang mga biktima gamit ang salbabida (inflatable tubes) sa dihang kalit silang gianod sa kusog nga balod palayo sa baybayon, hinungdan nga nahulog sila sa lawom nga bahin.
Daling miresponde ang CDRRMO-Tandag ug ang Philippine Coast Guard (PCG) Substation Tandag human makadawat og report gikan sa usa ka ginikanan. Upat ka biktima ang daling narekober kagahapong sa hapon ug gidala sa ospital, apan duha kanila ang nakabsan sa kinabuhi.
Ang ikalima nga biktima, usa ka lalaki, nga gideklara nga missing hangtod nga nakit-an kini nga wala nay kinabuhi kaganihang alas 9:15 sa buntag, Abril 30, atol sa gihimong follow-up search operations.
Tungod sa panghitabo, subli nga nagpahinumdom ang mga otoridad sa tanang ginikanan ug mga tigbantay nga hugot nga bantayan ang mga bata kon maligo sa dagat. Gihangyo usab ang publiko nga mag-igmat kanunay sa mga kusog nga sulog ug balod aron malikayan ang susamang trahedya.
Photo courtesy: CDRRMO-Tandag
