Nasikop sa kapulisan ang usa ka tricycle driver nga gituohang nag-sideline og baligya og ilegal nga droga atol sa buy-bust operation nga gipahigayon alas 11:00 sa gabii, Abril 30, 2026, sa Purok 10, Barangay Aplaya, Digos City.
Ang operasyon gipangunahan sa City Drug Enforcement Unit sa Digos Police Station, uban sa PDEU ug PDEA Davao del Sur. Nadakpan ang suspek giila nga si alyas “Ton,” 33-anyos, residente sa maong barangay ug giklasipikar isip Street Level Individual.
Sa buy-bust operation, napalitan ang suspek og usa ka sachet sa gidudahang shabu, ug nasundan pa kini og pagkarekober sa duha ka dugang pakete sa iligal nga droga, cellphone, ug ₱1,000 nga marked money.
Sumala sa kapulisan, ang nakompiska nga droga adunay gibug-aton nga 0.82 gramos ug gibana-banaang kantidad nga ₱5,576. Dugang pa, dugay na gipanid-an ang suspek nga nagbaligya og shabu samtang nagpasahero isip tricycle driver.
Karon, anaa na sa kustodiya sa Digos Police Station ang suspek samtang giandam ang kasong paglapas sa Republic Act 9165 o Comprehensive Dangerous Drugs Act of 2002.
