Nanawagan ang Motorcycle Taxi Community Philippines sa Congress of the Philippines nga paspasan ang pagpasa sa usa ka balaod nga magbutang og klarong lagda sa operasyon sa motorcycle taxi industry sa nasud.
Sumala sa grupo, importante nga ma-regulate ang sektor aron maprotektahan ang panginabuhian sa liboan ka riders, ilabi na karon nga nagpadayon ang pagsaka sa presyo sa gasolina ug uban pang palaliton.
Giingon ni Chairman Romeo Maglunsod nga bisan og dako ang pasalamat sa kasamtangang financial assistance sa gobyerno, kini temporaryo lamang ug dili makasustener sa dugay nga panahon.
Matod pa niya, ang kinahanglan mao ang lig-on ug klaro nga polisiya nga maghatag og kahigayunan sa mga riders nga makakita og tarong nga kita, makatrabaho nga may dignidad, ug makapadayon sa pagsuporta sa ilang pamilya.
Gipasiugda usab sa grupo nga ang motorcycle taxi industry kinahanglan pormal nga mailhan isip kabahin sa gig economy, diin maprotektahan ang katungod ug welfare sa mga riders.
Giduso usab nila nga ang accreditation o franchise ihatag direkta sa mga riders, sama sa sistema sa TNVS drivers, imbis nga kontrolado lamang sa mga platform companies.
Sa karon, ang motorcycle taxi operations sa nasud anaa gihapon ilawom sa pilot study nga nagsugod niadtong 2019, nga unta matapos sa 2021 apan gipalawig hangtod karon.
Ang mga nag-unang platform sa industriya mao ang Angkas, Joyride, ug Move It.
