Gipasabot sa National Food Authority ( NFA) Zamboanga del Sur kon nganong usahay sagol yellow ang kalidad sa bugas nga ilang gipagawas.
Sa pakighinabi sa Juander Radyo News Team, giingon ni Acting Branch Manager Rogelio Antonio Lumo nga ang pagka-yellow sa bugas naggikan sa kalidad sa humay nga ilang napalit.
Matod pa niya, adunay mga humay nga daan nang adunay discoloration bisan wala pa kini maproseso.
Gidugang usab nga gitugotan sa NFA Zamboanga del Sur ang pagpalit sa maong klase sa humay aron masuportahan ang mga mag-uuma ug mapadayon ang procurement sa ilang ani.
Samtang sa proseso sa pagtipig sa bugas sa bodega, mahimong moabot og hangtod unom ka bulan ang stocks antes kini ipaggaling.
Tungod niini, posible gihapon nga adunay mogawas nga yellowish nga bugas nga mamatikdan sa mga konsumidor.
Bisan pa niini, gipasalig sa NFA nga padayon ang ilang modernization sa mga kahimanan ug processing facilities aron mapauswag pa ang kalidad sa bugas ug masiguro ang kaluwasan sa publiko.
