Gidasig sa Overseas Workers Welfare Administration (OWWA) Zamboanga del Sur, ang tanang Overseas Filipino Workers (OFWs) nga magpadayon sa pagbayad sa ilang membership contribution matag duha ka tuig aron makabenepisyo sa nagkadaiyang serbisyo ug tabang nga gitanyag sa gobyerno.
Sa pakighinabe sa Junader Radyo News Team kang Fathmia Iran Bonga, Family Welfare Officer, gibutyag niini nga ang membership sa OWWA adunay duha ka klase nga pamaagi, aron masiguro nga ang mga OFWs adunay proteksyon ug access sa mga programa sa gobyerno, lakip na ang welfare assistance, livelihood support, ug reintegration services.
Dugang pa niya, nga ang maong membership dili na mahimong bayaran sa kanhing OFWs, tungod kay kini alang lamang sa mga aktibong nagtrabaho sa abroad.
Gipasabot sa ahensya nga ang aktibong membership maghatag og oportunidad sa mga OFWs nga makadawat og tabang sa panahon sa emerhensiya, sama sa medical assistance, financial aid, ug uban pang benepisyo alang sa ilang pamilya.
Giawhag usab ang mga OFWs nga siguruhon nga updated ang ilang membership aron dili maputol ang ilang kahigayonan sa pag-avail sa mga serbisyo sa OWWA.
