Nagpasiugda og 3rd Quarter Media Forum ang Integrated Provincial Health Office o IPHO sa Zamboanga Sibugay niadtong Oktubre 22, 2026, nga gipahigayon sa ilang buhatan sa probinsya.
Gitambongan kini sa pipila ka mga personahe sa nagkalainlaing media outlets sa Zamboanga Sibugay aron hisgutan ang mga nag-unang programa ug isyu nga may kalabotan sa panglawas sa publiko.
Lakip sa mga hilisgutan nga gipresentar atol sa maong kalihokan ang breast cancer, immunization ug nutrition, ingon man ang mental health. Tumong niini nga mapalapdan ang kahibalo sa mga media personnel aron mas epektibo nilang maipaabot sa publiko ang tukmang impormasyon mahitungod sa pag-atiman ug pagpanalipod sa panglawas.
Pinaagi sa maong forum, gilaoman nga mas molig-on ang panag-uban sa IPHO ug sa media sa pagpakaylap sa mga programa ug kampanya sa panglawas, ilabi na sa pagdasig sa mga lumulupyo nga magpakonsulta, magpabakuna, magpraktis og hustong nutrisyon ug maghatag og pagtagad sa ilang mental health.
