Nakadawat og assistance ang 200 ka tricycle drivers sa lungsod sa Siay, Zamboanga Sibugay, aron makatabang sa ilang adlaw-adlaw nga panginahanglan ug panginabuhi, ilabina sa padayon nga pagsaka sa presyo sa krudo.
Kini nga tabang gitumong sa pagtabang sa mga drayber nga direktang apektado sa pagsaka sa presyo sa gasolina, nga dakog epekto sa ilang kita matag adlaw. Tungod sa mahal nga krudo, mas dako ang ilang nagasto sa operasyon sa ilang mga traysikol, samtang kinahanglan gihapon nilang mangita og igong kita alang sa panginahanglan sa ilang pamilya.
Sumala sa gipadayag ni Second District Representative Doc Marly Hofer-Hasim, importante nga matagad ang kahimtang sa mga drayber nga naningkamot sa pagpanginabuhi matag adlaw aron masuportahan ang ilang mga pamilya.
Pinaagi sa maong assistance, gilaoman nga makatabang kini sa pagpagaan sa pinansyal nga palas-anon sa mga benepisyaryo. Gipasiugda usab ang pagpadayon sa paghatag og suporta sa mga ordinaryong mamumuo nga nagpaningkamot sa pagpanginabuhi taliwala sa nagkataas nga gasto sa adlaw-adlaw nga panginahanglan.
