Padayon ang paghatag og tabang sa mga pamilyang Sibugaynon pinaagi sa Bawat Bayan Makikinabang Rice Distribution Program nga inisyatibo ni Presidente Ferdinand “Bongbong” Marcos Jr. Pormal nang gipahigayon ang pag-apod-apod sa bugas ngadto sa mga barangay sa lungsod sa Naga, Zamboanga Sibugay, aron makatabang sa panginahanglan sa mga pamilya, ilabina sa ilang adlaw-adlaw nga pagkaon.
Personal nga mitambong sa maong kalihokan si Zamboanga Sibugay Governor Ann K. Hofer, kauban si Vice Governor RicRic Olegario, Municipal Vice Mayor Jimboy Jambaro, ug ang mga kapitan sa nagkalainlaing barangay. Nagkahiusa ang mga opisyal sa nasyonal ug lokal nga kagamhanan aron masiguro nga mahatod ang maong tabang ngadto sa mga benepisyaryo.
Pinaagi sa maong programa, gilaoman nga makatabang ang bugas nga maapod-apod sa pagpagaan sa gasto sa mga panimalay alang sa ilang pang-adlaw-adlaw nga panginahanglan. Kabahin usab kini sa paningkamot sa kagamhanan nga mapalig-on ang food security ug masiguro nga ang mga pamilyang nanginahanglan adunay pagkaon sa ilang lamesa.
Gipasiugda sa Provincial Government of Zamboanga Sibugay ang kamahinungdanon sa panaghiusa sa nasyonal ug lokal nga kagamhanan sa paghatag og serbisyo ug suporta sa katawhan. Pinaagi sa padayon nga pagtinabangay, tumong niini nga mas daghang pamilyang Sibugaynon ang makabenepisyo sa mga programa nga gitumong sa pagpauswag sa ilang panginabuhi ug kahimtang sa kinabuhi.
