Nadakpan sa kapulisan ang napulo ka wanted person, atol sa 15 ka operasyon sa pagpatuman sa mga warrant of arrest nga gilunsad sa Police Regional Office 12 sa nagkalain-laing lugar sa SOCCSKSARGEN. Lakip sa gipunting sa mga operasyon ang lima ka Top Ten Most Wanted Persons ug napulo ka laing indibidwal nga gipangita sa balaod.
Usa sa mga importanteng nahimo sa kampanya mao ang pagdakop sa usa ka Provincial Top 6 Most Wanted Person sa Barangay Calabanit, Glan, Sarangani Province, tungod sa giingong malversation of public funds or property ug unom ka ihap sa falsification of public document. Sa General Santos City, nasikop usab sa Police Station 9 ang usa ka City Top 7 Most Wanted Person sa Barangay Labangal tungod sa kasong statutory rape. Samtang, ang ubang mga operasyon miresulta usab sa pagdakop sa mga wanted person sa Midsayap, Bagumbayan, Tacurong City, Polomolok, Maitum ug General Santos City.
Gawas sa napulo ka bag-ong nadakpan, tulo ka warrant ang gipatuman sa mga indibidwal nga anaa na sa kustodiya sa mga pasilidad sa detensyon o estasyon sa kapulisan, samtang duha ka kaso ang nanginahanglan pa og beripikasyon tungod sa mga report nga na-dismiss kaniadto. Nagpakita ang maong mga operasyon sa padayong paningkamot sa kapulisan, sa pagpatuman sa mga warrant of arrest ug pagpangita sa mga indibidwal nga giatubang ang nagkalain-laing kaso sa korte. Tumong niini, nga masiguro nga ang mga suspek motubag sa mga kasong gipasaka batok kanila subay sa hustong proseso sa balaod og mapadayon ang kalinaw, kahusay ug kaluwasan sa mga komunidad.
Photo courtesy: PNP Police Regional Office 12
