Nadakpan sa kapulisan ang usa ka 40-anyos nga lalaki atol sa buy-bust operation sa Barangay Lower Dado, Alamada, Cotabato, alas-10:03 sa gabii niadtong Oktubre 21, 2026, tungod sa giingong kalambigitan niini sa ilegal nga droga.
Giila ang nadakpan sa alyas nga “RR,” ulitawo ug mag-uuma nga residente sa Purok Santol, Barangay Lower Dado. Gipangulohan sa Alamada Municipal Police Station ang operasyon, kauban ang 2nd Cotabato Provincial Mobile Force Company, Provincial Drug Enforcement Unit, Provincial Intelligence Unit sa Cotabato Police Provincial Office, Special Tracker Team Echo sa RID 12 ug 1203rd Regional Mobile Force Battalion 12.
Kabahin sa padayong kampanya sa Philippine National Police, batok sa ilegal nga droga ang maong operasyon aron mapugngan ang pag-apod-apod niini ug mapalig-on ang kalinaw ug kaluwasan sa komunidad. Sa kasamtangan, nagpadayon ang pagproseso sa kaso batok sa suspek tungod sa giingong paglapas sa Republic Act No. 9165 o Comprehensive Dangerous Drugs Act of 2002, subay sa hustong pamaagi ug proseso sa balaod.
Photo courtesy: PNP Alamada Municipal Police Station
