Nagpirmahay ang lokal nga kagamhanan sa Iligan City ug ang European Union pinaagi sa Memorandum of Agreement o MOA alang sa giplanong pagtukod sa usa ka modernong Integrated Circular Economy Facility nga gitumong sa pagsulbad sa nagkadakong hagit sa pagdumala sa basura sa siyudad.
Gipresentar sa pagpirma sa kasabutan si European Union Ambassador to the Philippines Massimo Santoro, uban nila ni Public-Private Partnership Center of the Philippines Project Development Director Raphael Badillo, Department of Trade and Industry Region 10 Assistant Regional Director Almer Masillones, ug EU-PH Green Economy Partnership Project Leader Mary Antonette Flores.
Matud ni City Administrator Dr. Darwin Manubag, naglakip ang proyekto sa 23-ektaryang Category 4 sanitary landfill nga dili lamang ordinaryong tambakan sa basura, kondili adunay teknolohiya sa pagproseso ug paggamit pag-usab sa mga hugaw, lakip ang bio-conversion pinaagi sa Black Soldier Fly technology, paghimog abono o composting, mga sistema sa pag-recycle ug maalamong pagmonitor sa pasilidad.
Tumong sa siyudad nga mosaka sa 50 porsiyento ang waste diversion sa unang tuig sa pagpatuman sa proyekto ug moabot sa 60 porsiyento sa ikatulong tuig.
Lauman nga makatampo kini sa pagpanalipod sa kinaiyahan, paghatag og panginabuhian sa mga informal waste worker, ug mahimong sumbanan sa malungtarong pagdumala sa basura sa ubang mga siyudad sa nasud.
