Gibutyag ni Mayor Rolan “Kerwin” Espinosa nga sugdan na sa labing dali nga panahon ang konstruksyon sa usa ka semi-Olympic size nga swimming pool sa Albuera.
Sumala pa sa alkalde, giandam na ang pondo nga moabot og ₱10 milyones alang sa proyekto nga gilaumang makatabang sa paghulma sa lokal nga mga atleta.
Gipaambit usab ni Espinosa nga ang ideya naggikan sa iyang obserbasyon nga naglisod ang mga atleta sa Albuera sa pagbansay tungod kay kasagarang puno ang mga swimming pool sa dakbayan sa Ormoc gumikan sa daghan usab nga atleta niini ug matod pa nga kinahanglan pa silang magrenta.
Ang maong pasilidad itukod sa Soob, Poblacion, nga gilaumang mahimong sentro sa pagbansay ug pagpalambo sa talento sa larangan sa swimming sa lungsod.
Dugang pa sa alkalde, tumong sa proyekto nga mapalig-on ang sports development sa Albuera ug mahatagan og igong pasilidad ang mga kabatan-onang gustong mosalmot sa kompetisyon.
