Gibutyag ni Housing and Resettlement Office Department Head Reynaldo Roque ang bag-ong giya sa pag-aplikar sa permanent housing program sa syudad sa Iligan-ug klaro ang mensahe ang botante maoy una sa linya.
Sumala ni Roque sa Ordinance 27, prayoridad ang mga rehistradong botante sa Iligan nga nakabotar na ug labing menos kausa ug wala pa gayud makapahimulos sa bisan unsang housing program sa gobyerno.
Sa laing bahin, dili na mahimong maka-avail pag-usab ang mga pamilya nga naapektuhan sa Sendong nga nakadawat na og permanent shelter kaniadto.
Giklaro usab ni Roque nga apil sa konsiderasyon ang kahimtang sa kita, diin mas giuna ang mga ubos og income. Apan bisan pa niini, gipasiugda nga ang pinaka-importante nga kwalipikasyon mao gihapon ang pagka-botante sa Iligan ug ang wala pa makabenepisyo sukad sa housing program.
Ang bag-ong palisiya nagtinguha nga masiguro nga ang tabang sa gobyerno mahatag ngadto sa mga lehitimong residente ug botante nga wala pa matabangi sa miaging mga programa.
