Wala na natabang ang usa ka 12-anyos nga batang babaye human kini madamay sa pagbinayloay og bala atol sa engkwentro tali sa kapulisan ug usa ka suspek sa Purok Pandian Extension, Barangay Labangal, General Santos City, pasado alas 11 sa buntag, Abril 18, 2026.
Dead on the spot usab ang suspek nga lalaki, hingkod ang panuigon nga kasamtangang nanimuyo sa maong lugar.
Base sa inisyal nga report, nagsugod ang panghitabo sa usa ka indiscriminate firing diin ang suspek matod pa ang unang nagpabuto sa iyang pusil. Tungod niini, napugos ang mga kapulisan nga mobalos, nga misangpot sa pinusilay.
Sa pamahayag sa iyaan nga si Melanie Takabil, ang 12-anyos nga bata anaa sa sulod sa panimalay kauban ang iyang lima ka ig-agaw nga pulos usab mga bata.
Sa kahadlok, gigakos sa 12-anyos ang iyang mga ig-agaw ug nitago sila ilawom sa katre. Apan walay swerte kini nga naigo sa bala nga milapos sa bongbong sa balay ug giingong niigo sa tangkugo sa biktima nga maoy hinungdan sa iyang kamatayon.
Sa pagkakaron, wala pa’y igong detalye nga gipagawas ang mga otoridad kabahin sa tinuod nga rason sa operasyon.
Padayon pa ang imbestigasyon aron matino ang tanang anggulo sa insidente ug masuta kung aduna bay kakulangan sa maong operasyon.
