Paspas nga giatiman ang unom ka mga menor de edad, ug usa ka 18-anyos nga batan-on human sila malampusong na-rescue gikan sa giingong human trafficking sa Davao City niadtong nakalabay nga adlaw.
Sumala sa report, dihang nadawat ang impormasyon, daling gisundo ni Dinagat Island Governor Nilo P. Demerey Jr. uban si BM Nilo Marco Demerey, aron masiguro nga mahatagan og dinaliang pag-atiman ang mga biktima samtang anaa sa kustodiya sa City Social Worker sa Ecoland.
Lakip sa ilang gihimo ang paghatag og pagkaon, maayong kapuy-an, ug pinansyal nga tabang aron mapadali ang pagpauli sa mga biktima sa San Jose, Province of Dinagat Islands.
Midugang usab og suporta si Mayor Ruben Kiking Zuniega, ingon man si Vice Governor Jade Ecleo ug ubang kauban nga organisasyon aron matabangan ang mga biktima.
Samtang, gihan-ay na sa mga otoridad ang mga posibleng ebidensya batok sa suspetsado nga si Marilou Perez Eviota, residente sa Barangay Matingbe, alang sa kasong human trafficking.
Sa pagkakaron, nagpadayon ang pag-atiman sa mga biktima ubos sa Social Welfare aron masiguro ang ilang kahimtang ug mapaspas ang ilang pag-recover gikan sa maong kasinatian.
