Padayon ang implementasyon sa lima ka mga road projects sa probinsya sa Surigao del Sur nga nagkantidad og dul-an sa PHP2 bilyon, isip kabahin sa mga lakang aron mapalig-on ang kalinaw ug mapauswag ang ekonomiya sa rehiyon.
Sumala sa provincial nga panggamhanan nag ang maong mga proyekto ginapatuman ubos sa administrasyon ni Surigao del Sur Governor Johnny T. Pimentel inubanan sa Office of the Presidential Adviser on Peace, Reconciliation and Unity (OPAPRU).
Sumala sa Governor, usa na sa lima ka proyekto ang nahuman ug naturnover sa miaging tuig—ang JNR-Carromata Road sa lungsod sa San Miguel nga nagkantidad og PHP90 milyon. Matod niya, ang dalan nakatabang sa pagpalambo sa konektibidad sa mga komunidad ug usa usab ka lakang aron matubag ang mga hagit sa seguridad ug ekonomiya sa lugar.
Nagsugod na usab ang groundbreaking sa duha ka bahin sa dalan nga nagkonektar sa Barangay Bagyang ngadto sa Barangay Bitaugan sa San Miguel (Phase I ug Phase II), nga adunay kinatibuk-ang pondo nga PHP60 milyon.
Lakip usab sa mga napondohan karong tuiga ang concreting sa Rajah Cabungsuan Road Phase I padulong sa Barangay Bogak sa Lingig (PHP80 milyon), ug ang farm-to-market road sa Barangay Diatagon, Lianga (PHP60 milyon), nga gilauman makatabang sa pagpasayon sa transportasyon sa mga produkto sa uma.
Usa sa mga giila nga major project mao ang PHP450 milyon nga Integrated Coconut Processing Project sa lungsod sa Hinatuan. Sumala sa gobernador, ang maong lungsod adunay halapad nga yutang angay sa pagtanom og lubi, nga mahimong pundasyon sa pagpalambo sa coconut industry.
Ang giplanong pasilidad adunay kapasidad nga makaproseso og hangtod 30,000 ka lubi matag adlaw alang sa produksyon sa mga high-value products sama sa lana ug asukal gikan sa lubi. Gilauman usab nga kini makadugang sa kita sa mga mag-uuma, makahatag og trabaho, ug makapalig-on sa value chain sa lubi sa probinsya.
Sumala sa provincial government, ang proyekto na-endorso na sa Department of Economy, Planning and Development ubos sa Regional Network of Infrastructure Projects ug target nga masugdan sa 2028.
Dugang pa, naaprobahan na usab ang PHP26 milyon nga Coco Jam Processing Facility sa Tagasaka, Hinatuan nga gipondohan sa Philippine Center for Postharvest Development and Mechanization, nga gilauman masugdan ang implementasyon karong tuiga.
Sa kasamtangan, nagpadayon usab ang ubang road concreting projects sama sa PHP50 milyon nga proyekto sa Barangay Bagyang, San Miguel, ug PHP48 milyon sa Barangay Caras-an, Tago.
