Nakadawat og kinatibuk-ang 180 ka set sa solar-powered streetlights ang 18 ka barangay sa lungsod sa San Miguel niadtong nakalabay nga adlaw, isip kabahin sa programa sa Probinsyal nga panggamhanan sa Surigao del Sur nga nagtumong sa pagpaayo sa kahayag sa kadalanan ug pagpalig-on sa seguridad sa komunidad.
Ang proyekto gipangunahan sa probinsyal nga panggamhanan og gilauman nga makatabang ilabi na sa mga lugar nga kulang og suga sa gabii.
Gidawat sa lokal nga pangagamhanan sa San Miguel ang maong mga kagamitan ubos sa liderato ni Municipal Mayor Michael T. Corilla ug Municipal Vice Mayor Dodong Perez, uban sa presensya sa mga barangay kapitan sa lungsod.
Sumala sa pamahayag sa LGU San Miguel, ang pagbutang sa solar-powered streetlights makatabang sa pagpaayo sa visibility sa kadalanan ug pagpakunhod sa posibleng krimen, ilabi na sa kagabhion.
Gibutyag usab sa lokal nga opisyal ang kahinungdanon sa padayon nga suporta sa probinsyal nga gobyerno aron mapalambo ang imprastruktura sa hilit nga mga dapit.
Samtang gipasalamatan sa LGU ang mga opisyal sa probinsya, diin matod pa nga maong proyekto resulta sa koordinasyon tali sa nagkalain-laing ahensya, lakip ang Provincial Engineering Office nga maoy mitabang sa logistics ug implementation.
