Nasakmit sa mga otoridad ang gidili nga mga butang sulod sa Bureau of Jail Management and Penology (BJMP) Surigao del Sur District Jail niadtong nakalabay nga adlaw, atol sa regular nga visitation schedule.
Sa report, usa ka bisita ang nadakpan human makit-an ang mga dahon sa tabako nga gitahi ug gitago sulod sa iyang bag, nga klarong paglapas sa mga patakaran sa pasilidad.
Ilalom sa pagpanguna ni Rhodora S. Gamale, dali nga miaksyon ang duty personnel pinaagi sa pagkumpiska sa maong kontraband ug pagseguro sa hustong proseso sa dokumentasyon ug pagreport, subay sa ipinatuman nga standard operating procedures.
Gipahinumdoman sa BJMP nga ang maong insidente naglangkob sa paglapas sa Ordinance No. 28-20 nga nagdili sa pagsulod ug pagpanag-iya sa kontraband sulod sa mga jail ug custodial facilities sa probinsya.
Nagpasidaan usab ang ahensya nga ang bisan kinsa nga mo supak niini, mag atubang og silot sumala sa balaod.
Gipasiugda sa BJMP ang kahinungdanon sa kooperasyon sa publiko aron mapadayon ang disiplina, kaluwasan, ug seguridad sulod sa mga pasilidad. Sumala sa ahensya, ang maong paningkamot kabahin sa mas lapad nga kampanya sa pagpalig-on sa integridad ug kaayohan sa custodial system sa nasud.
