Pormal na nga giabrihan ang Bonifacio-Poctoy Bridge, atol sa blessings and inauguration niadtong nakalabay nga adlaw, usa ka mahinungdanong proyekto sa imprastraktura nga gilauman nga makatabang sa mas paspas ug mas luwas nga pagbiyahe sa mga residente ug motorista sa maong lugar.
Ang kalihukan gipangunahan ni Regional Director Engr. Sabeniano Calliao Jr. sa Department of Public Works and Highways (DPWH), 2nd DEO District Engineer Dohjie Morales ug uban pang ahensya.
Didto usab si Governor Robert Lyndon Barbers ug Mayor Paul Dumlao, kinsa mipahayag sa ilang suporta sa padayon nga pagpalambo sa imprastraktura sa probinsya.
Kini nga tulay nagsilbi na alternatibo na dalan gikan sa seksyon sa Surigao–Agusan sa Daang Maharlika padulong sa Lipata Port.
Pinaagi niini, mas mapadali na ang pagbiyahe sa mga motorista ug ang paghatod sa mga produkto ug serbisyo ngadto sa nagkalain-laing dapit. Gilauman nga dako kini’g ikatampo sa lokal nga ekonomiya ug sa kaluwasan sa publiko.
