Gisaksihan sa mga Samaleño ang usa ka dakong kalampusan sa Island Garden City of Samal (IGACOS) human sa opisyal nga pagbukas sa Samal Public Market ug sa IGACOS Overland Transport and Integrated Terminal sa Sitio Maag, Brgy. Peñaplata sa nasangpit nga syudad.
Ang maong kalihokan matod pa giisip nga usa ka mahinungdanong lakang padulong sa mas maayong serbisyo alang sa katawhan sa maong dakbayan. Giingon nga ang bag-ong pampublikong merkado naghatag og mas limpyo, organisado, ug kombinyenteng palibot alang sa mga vendor ug mamalitay.
Gilauman nga kini makapalig-on sa lokal nga ekonomiya pinaagi sa paghatag og hapsay nga pwesto sa mga negosyante ug preskong produkto sa makatarunganong presyo alang sa mga konsumidor. Samtang ang integrated terminal magpasayon usab sa biyahe sa mga komyuter pinaagi sa mas sistemado ug luwas nga transportasyon.
Gidapit ang tanang Samalenyo nga bisitahon ug suportahan ang bag-ong pasilidad pinaagi sa pagpalit sa lokal nga produkto ug pagsuporta sa kaugalingong mga negosyante, aron mas mapalambo pa ang komunidad ug ekonomiya sa IGACOS.
Photo Courtesy: Samal Info
