Gipresentar sa mga personahe sa Philippine National Police (PNP) ngadto sa Municipal Mayor sa Polomolok, South Cotabato, ang mga kanhing rebelde o surrenderers aron matan-aw ang posibleng tabang ug suporta nga mahatag kanila sa lokal nga pangagamhanan.
Gipahigayon ang maong courtesy call niadtong Nobyembre 3, 2026, sa mga personahe sa 1205th Maneuver Company sa Regional Mobile Force Battalion 12 (RMFB 12), ubos sa pagpangulo ni PCPT Leon Pelin Siringan Jr., Officer-in-Charge, ug sa superbisyon ni PCOL Samuel T. Cadungon, Force Commander sa RMFB 12.
Atol sa pagbisita, gipahibalo ang mga surrenderer sa nagkalain-laing programa ug benepisyo nga ilang mahimong ma-avail gikan sa LGU, lakip na ang pinansyal nga ayuda o allowance, bugas ug uban pang matang sa suporta.
Gipasabot usab nga bisan pa man sa ilang pagka-surrenderer, kwalipikado gihapon sila nga makadawat sa angay nga tabang sa gobyerno aron matabangan silang makasugod pag-usab sa ilang kinabuhi, mapalambo ang panginabuhian ug mahimong produktibong miyembro sa komunidad.
Tumong sa maong kalihokan nga palig-onon ang koordinasyon tali sa PNP ug lokal nga panggamhanan alang sa pagmintinar sa kalinaw ug kahusay, ingon man sa malungtarong pagbalik sa mga kanhing rebelde ngadto sa mainstream society.
Photo courtesy: ASTRON RMFB XII
