Patay ang usa ka wala pa mailhing babaye human nalatayan sa transit mixer sa may crossing sa National Highway duol sa Sugarland, Barangay Lumbo, Valencia City, Bukidnon niadtong Setyembre 27, 2026, mga alas-5:25 sa hapon.
Base sa inisyal nga imbestigasyon sa Valencia City Police Station, nagsubay ang Fuso Supergreat Transit Mixer gikan sa Sugarland paingon sa National Highway ug nihunong sa crossing aron mohatag dalan. Apan sa dihang pakurbada na unta sa wala nga bahin ang driver, ang biktima nga naglakaw sa atubangan sa sakyanan misulay sa pagdagan apan natumba ug didto nalatayan sa atubangan ug luyo nga ligid niini.
Nakaangkon og grabeng injury sa lawas ang biktima ug gidali pagdala sa mga rescuer sa Polymedic Hospital, apan gideklarar kini nga dead on arrival bandang alas-5:50 sa hapon sa maong adlaw.
Sa kasamtangan, ang 44-anyos nga driver ug ang maong transit mixer gikostudiya na sa Valencia CPS alang sa dugang beripikasyon ug saktong disposisyon.
Photo courtesy:Valencia City Police Station
