Naglunsad og duha ka adlaw nga transport strike ang transport group nga Pagkakaisa ng mga Samahan ng Tsuper at Opereytor Nationwide (PISTON) sugod Martes, Setyembre 29, aron paninglan ang gobyerno nga ihunong ang pagsaka sa presyo sa lana ug hatagan og “living wage” ang mga drayber sa jeepney.
Gipasugdan ang mga protesta alas-6 sa buntag sa nagkalain-laing strike centers sa Metro Manila sama sa Novaliches, Sucat, Alabang, ug Las Piñas, diin gihingusgan sa grupo ang pagtangtang sa value-added tax ug excise tax sa mga produkto sa petrolyo, pagpaubos sa presyo sa lana ngadto sa P55 matag litro, ug pagbasura sa Oil Deregulation Law tungod kay giisip nilang kulang kaayo ang gipatuman nga P1 fare increase.
Gipasabot ni PISTON National President Mody Floranda nga dili igo ang ilang kita tungod kay samtang mokabat sa P3,000 ang ilang magasto sa diesel, ang dugang kita gikan sa 200 ka pasahero sa usa ka adlaw moabot lamang sa P200. Gibanabana nga moabot sa 70,000 hangtod 100,000 ka mga drayber ug operador ang nisalmot sa nationwide strike nga gihimo usab sa Bulacan, Pampanga, Baguio, Rizal, Naga, Sorsogon, Cebu, Panay, Iloilo, Bacolod, Davao, ug General Santos City, bisan pa man sa pasidaan sa Land Transportation Franchising and Regulatory Board (LTFRB) nga posibleng mameligro ang ilang mga prangkisa.
Gihagit usab ni Floranda si Presidenre Marcos nga ibasura ang mga balaod nga kontra-welga ug kontra-protesta kon tinuod kining nagrespeto sa ilang katungod, lakip na ang panawagan sa pagbuwag sa Anti-Terrorism Law ug National Task Force to End Local Communist Armed Conflict. Ang nasudnong protesta sa mga drayber ug operador gikatakdang matapos karong Miyerkules, Setyembre 30.
Photo courtesy: Instagram
