Gikalipay sa Dulangan Higaonon Ancestral Domain Association Incorporated ang pag-apruba sa Small-Scale Mining sa Awang, Opol, Misamis Oriental, nga gilauman nilang makapalig-on sa panginabuhian sa mga Indigenous Peoples o IPs sa lugar.
Matud ni Datu Chieftain Romil Mansilao Sr., dugay nang kabahin sa ilang panginabuhian ang pagpangita og mga gasa sa kinaiyahan pinaagi sa ginagmay nga pagmina, nga nahimong tinubdan sa panginabuhi sa ilang komunidad sulod sa daghang katuigan.
Dugang pa ni Datu Mansilao, pinaagi sa paglegal sa kalihokan, subli nilang mapahimuslan ang mga gasa sa kinaiyahan nga ilang giingong gibilin pa sa ilang mga katigulangan.
Hisayran nga niadtong Lunes, pormal nga gipirmahan sa Capitol Grounds sa Misamis Oriental ang unang Interim Small-Scale Mining Contracts aron hatagan og legal nga paagi ang mga IPs sa pagmina sa dapit.
Gilauman nga pinaagi sa kasabutan, mas organisado ug subay sa mga lagda ang pagpatuman sa small-scale mining, samtang mapadayon ang panginabuhian sa mga lumad nga komunidad.
Photo courtesy: Misamis Oriental Information Office
