Epektibo na kagahapong adlawa, Lunes, Setyembre 28, ang mas taas nga pamasahe sa mga pampublikong sakyanan. Samtang, padayon nga gipalihok sa mga transport group nga Manibela ug Piston ang ilang planong protesta tungod sa padayon nga pagsaka sa presyo sa mga produktong petrolyo.
Base sa gi-aprobahang bag-ong fare matrix sa Land Transportation Franchising and Regulatory Board (LTFRB), mosaka gikan P13 ngadto sa P14 ang minimum nga pamasahe sa ordinaryong jeepney alang sa unang upat ka kilometro. Dugangan usab kini og P2 sa matag sunod nga kilometro. Alang sa modern public utility jeepneys, mahimong P17 ang minimum nga pamasahe, samtang adunay dugang nga P2.40 sa matag sunod nga kilometro.
Alang sa mga city bus, mahimong P15 ang minimum nga pamasahe sa unang lima ka kilometro, nga adunay dugang nga P2.49 sa matag sunod nga kilometro. Sa air-conditioned bus, mahimong P18 ang minimum nga pamasahe ug adunay dugang nga P3 kada sunod nga kilometro. Sa provincial bus, mosaka usab og P2 hangtod P3 ang pamasahe sa matag sunod nga kilometro, depende sa klase sa bus.
Samtang, madugangan usab og P2.60 hangtod P3 ang pamasahe sa UV Express sa matag sunod nga kilometro. Gimandoan sa Department of Transportation ang mga operator nga ipaskil ang bag-ong fare matrix. Padayon usab nga ihatag ang diskwento sa pamasahe alang sa mga estudyante, senior citizen ug persons with disabilities (PWDs).
Photo Courtesy: Media meter
