Mokabat sa 337,476 ka mga trabahante sa pribadong sektor sa Central Visayas ang makabenepisyo sa P42 nga dugang sa minimum wage human giaprubahan sa National Wages and Productivity Commission (NWPC) ang wage order alang sa rehiyon. Sumala sa Department of Labor and Employment (DOLE), mahimong epektibo ang bag-ong wage rates sa Oktubre 14.
Ubos sa bag-ong wage order, ang minimum wage sa mga lugar nga sakop sa Class A mahimong P582 kada adlaw, samtang P542 kada adlaw naman sa mga lugar nga sakop sa Class B. Sakop niini ang mga trabahante sa pribadong sektor sa Cebu, Bohol, Negros Oriental ug Siquijor.
Gi-aprobahan sa NWPC ang wage order atol sa deliberasyon nga gihimo sa DOLE Regional Office VII sa Cebu niadtong Septiyembre 26. Lima ka commissioners ang mitambong ug nagkahiusa sa deliberasyon, samtang duha ang wala makatambong. Sa wala pa kini, gisumite sa Regional Tripartite Wages and Productivity Board (RTWPB) VII ang wage order ngadto sa NWPC alang sa pagsusi ug pag-apruba.
Gipahigayon sa RTWPB VII ang proseso sa pagtino sa bag-ong minimum wage pinaagi sa mga konsultasyon ug public hearings uban sa mga representante sa mga trabahante, management ug uban pang stakeholders sa Central Visayas. Human sa pag-apruba sa NWPC, ipatik na sa Regional Board ang wage order subay sa mga gitakdang lagda sa wala pa kini ipatuman sa Oktubre 14.
