Naglaum si Presidente Ferdinand Marcos Jr. nga ang bag-ong kasabotan sa Free Trade Agreement o FTA tali sa Pilipinas ug European Union magdala og dugang trabaho, pamuhunan ug oportunidad sa mga Pilipino.
Niadtong Septiyembre 22, nakab-ot sa Pilipinas ug EU ang substantial agreement sa negosasyon human sa panag-istorya ni Marcos ug European Commission President Ursula von der Leyen.
Matud ni Marcos, makatabang ang kasabotan sa pagpalig-on ug pag-diversify sa supply chains ug maghatag og mas dagkong oportunidad alang sa mga mag-uuma, manufacturers, consumers ug micro, small and medium enterprises o MSMEs. Apil usab sa iyang gihisgutan ang bag-ong posibilidad sa artificial intelligence, digital technologies ug ubang importanteng sektor.
Matud sa European Commission, ang kasabotan gilauman nga makapalig-on sa trade ug investment pinaagi sa mas maayong kondisyon alang sa exporters, service providers ug investors sa duha ka bahin. Ang negosasyon unang gilunsad niadtong 2015, napahunong niadtong 2017, ug gibanhaw pag-usab human sa pagbisita ni von der Leyen sa Manila niadtong 2023.
Gisugdan pag-usab ang pormal nga negosasyon niadtong 2024, ug karon nagpadulong na kini sa konklusyon sa umaabot nga mga bulan. Gilauman usab nga mobalik si von der Leyen sa Pilipinas sa 2027 alang sa opisyal nga pagpirma sa kasabotan.
Photo courtesy: PCO
