Giaprobahan na sa Investment Coordination Committee-Cabinet Committee ang P2.48 bilyong public-private partnership (PPP) project para sa pag-upgrade ug pagpalapad sa National ID System. Gitawag kini nga Philippine Digital National Identity Project, nga nagtumong sa pagpalambo sa digital infrastructure ug mga serbisyo nga konektado sa National ID.
Lakip sa proyekto ang registration, card production, authentication services, ug technical integration alang sa mga pribadong sektor nga mogamit sa National ID. Apil usab ang operasyon ug maintenance sa mga importanteng ICT infrastructure sa National ID System.
Sumala kang PSA Undersecretary ug National Statistician Dennis Mapa, ipatuman ang proyekto ubos sa Build-Transfer-Operate arrangement, sulod sa 20 ka tuig nga concession period, human sa unom ka bulan nga transition period.
Mosulod na ang proyekto sa procurement stage, diin ang ubang private proponents mahimong mohagit o motupong sa proposal sa original proponent hangtod sa ika-upat nga quarter sa 2026.
Photo courtesy: wikipedia
