Gi-hold na sa Cagayan de Oro City Police Office (COCPO) ang duha ka police personnel human sila ma-intercept sa checkpoint nga gilunsad sa kapulisan sa Barangay Indahag, Cagayan de Oro City, diin adunay report sa pagpamusil.
Matod ni PMaj Emelita Simon, spokesperson sa COCPO, mitakdo sa description sa giingong suspek ang duha ka lalaki nga gi-intercept sa checkpoint. Apan nasuta nga mga miyembro diay sila sa COCPO nga naka-assign sa Indahag. Gi-disarmahan ang duha alang sa imbestigasyon ug hustong disposisyon, ug karon anaa sa Maharlika Detention Cell.
Gipasabot sa COCPO nga pasakaan sila og frustrated murder nga kaso. May kalabotan kini sa pagpamusil sa usa ka lalaki nga naigo sa paa, diin giingong nalambigit ang usa ka Police Executive Master Sergeant, human sa panaglalis sa usa ka piryahan sa lugar.
Padayon ang imbestigasyon aron matino ang tibuok panghitabo sa maong insidente.
