Naapod-apod na ang 5,762 ka PagbaBAGo Bags ngadto sa 40 ka mga eskwelahan nga nahimutang sa Geographically Isolated and Disadvantaged Areas o GIDA sa South Cotabato.
Gipangulohan kini sa Office of the Vice President – Southern Mindanao Satellite Office o OVP-SMSO, nga milusot sa mga layo, liblib ug lisod abutong mga lugar aron personal nga mahatod ang mga school supplies ngadto sa mga estudyante.
Sulod sa lima ka adlaw nga pagbiyahe, giatubang sa team ang nagkalain-laing kalisod sa dalan, lakip ang baga nga abog panahon sa ting-init, kalit nga pag-ulan, pagtabok sa mga sapa ug pagsaka sa matatarik nga mga dalan paingon sa kabukiran.
Adunay mga eskwelahan nga lisod maabot ug nanginahanglan pa og habal-habal, kabayo o 4×4 nga sakyanan aron maagian ang mga dalan nga lapokon ug batoon.
Kauban sa pag-apod-apod ang Alpha, Bravo ug Charlie Company sa 6th Infantry “Redskin” Battalion, ingon man ang Alpha ug Bravo Company sa 105th Infantry “Saifullah” Battalion sa Philippine Army.
Nakapahimulos niini ang mga estudyante gikan sa 40 ka mga eskwelahan sa Polomolok, Tupi, Surallah, Norala, Banga, Tantangan, Tboli ug Lake Sebu, South Cotabato. Ang matag PagbaBAGo Bag adunay mga gamit sa eskwela sama sa lapis ug papel, dental kit ug kapote, nga gilauman makatabang sa mga estudyante sa ilang adlaw-adlaw nga pag-eskwela.
Sumala sa OVP-SMSO, ang paghatod sa mga bag usa usab ka paagi aron ipakita sa mga estudyante sa mga hilit nga komunidad nga dili sila nakalimtan bisan pa man sa kalayo ug kalisod sa pag-abot sa ilang mga eskwelahan.
Gipasabot usab nga importante ang paghatag og suporta sa ilang pag-eskwela ug paghimo og luwas, hapsay ug malinawon nga palibot diin sila makakat-on ug makapadayon sa ilang mga pangandoy.
Ug bisan unang bahin pa lamang kini sa distribusyon sa PagbaBAGo Bags sa South Cotabato, 5,762 na ka estudyante ang natabangan pinaagi sa maong inisyatiba.
