Patay ang usa ka 66-anyos nga mag-uuma human gitaga gamit ang sundang sa usa ka 35-anyos nga lalaki, human sa ilang panaglalis sa Barangay Bololmala, Tupi, South Cotabato, niadtong nakalabay nga adlaw. Giila ang biktima sa alyas nga “Dan,” samtang ang suspek giila sa alyas nga “John,” nga silingan usab niini ug kapwa mag-uuma.
Base sa imbestigasyon sa Tupi Municipal Police Station, alas-9:40 sa gabii, miadto ang biktima sa balay sa suspek ug giingong gihampak kini gamit ang metal nga tubo.
Mibalos ang suspek pinaagi sa pagtigbas sa biktima gamit ang sundang. Bisan pa sa pagsulay sa duha ka silingan nga awaton sila, naigo na ang biktima ug gidayong gidala sa ospital apan gideklarang dead on arrival. Narekober sa kapulisan ang siyam ka pulgadang sundang nga adunay bahid sa dugo sa lugar nga nahitaboan.
Samtang, nadakpan ang suspek sa follow-up operation sa mga otoridad ug karon anaa na sa kustodiya sa Tupi MPS alang sa pagpangandam sa kasong ipasaka batok kaniya sa Office of the Provincial Prosecutor sa Polomolok, South Cotabato.
