Gipahigayon niadtong nakalabay nga adlaw, sa Roderics Resort, Lower Taway, Ipil, Zamboanga Sibugay ang pagpormular ug pag-finalize sa Ancestral Domain Investment Plan for Health o ADIPH. Mitambong sa maong kalihokan ang mga representante sa DILG, Provincial Health Office, Provincial DOH Office, NCIP-Ipil, Municipal Health Office sa Olutanga, lakip ang 16 ka Indigenous Peoples Mandatory Representatives o IPMRs gikan sa nagkadaiyang lungsod sa probinsya ug mga health coordinators.
Tumong sa maong kalihokan nga mailhan ug mahatagan og prayoridad ang mga panginahanglanon sa panglawas sa mga Indigenous Cultural Communities o ICCs ug Indigenous Peoples o IPs sulod sa ilang ancestral domain. Lakip niini ang pagplano sa mga programa ug pamuhunan nga makatabang sa pagpauswag sa ilang access sa serbisyong medikal.
Gitinguha usab pinaagi sa maong plano nga mahiusa ang modernong serbisyong panglawas ug tradisyonal nga pamaagi sa pag-atiman sa panglawas, nga nahiuyon sa kultura ug panginahanglanon sa mga katawhang lumad. Kabahin kini sa padayong paningkamot sa mga hingtungdang ahensya aron masiguro nga ang mga komunidad sa Indigenous Peoples maapil sa mga programa alang sa mas maayong panglawas ug malungtarong kalamboan.
Photo courtesy: Local Government Unit of Ipil / fb
