Nagpakita sa ilang suporta sa kaluwasan sa komunidad ang mga personahe sa Pikit Fire Station pinaagi sa pag-apil sa 4th Quarter National Simultaneous Earthquake Drill (NSED) nga gipahigayon sa Ladtingan Elementary School, Barangay Ladtingan, Pikit, Cotabato niadtong Nobyembre 5, 2026.
Ubos sa pagpangulo ni SFO4 Hector A. Flores, Acting Municipal Fire Marshal, gitumong sa maong kalihokan ang pagpalig-on sa kahibalo ug kaandam sa mga estudyante, magtutudlo ug uban pang kawani sa eskwelahan kon unsay hustong buhaton panahon sa linog.
Gipraktis sa mga partisipante ang importanteng pamaagi sa pagpanalipod sa kaugalingon sama sa “Duck, Cover, and Hold,” husto nga pagbakwit ngadto sa luwas nga lugar ug pagsiguro nga kompleto ang ihap sa mga personahe human sa pagbakwit.
Pinaagi niini, padayon nga gipasiugda sa Pikit Fire Station ang kamahinungdanon sa pagpangandam ug panaghiusa sa nagkadaiyang sektor aron mamenosan ang posibleng kadaot ug malikayan ang pagkawala sa kinabuhi panahon sa linog ug uban pang kalamidad.
Photo courtesy: BFP Pikit
