Gipakusgan sa Matalam Municipal Police Station, ubos sa pagpangulo ni PLTCOL Marvin C. Hugos, ang kampanya batok sa pagbaligya sa ilegal nga sigarilyo sa lungsod sa Matalam, Cotabato, pinaagi sa pagbisita ug pagmonitor sa nagkalainlaing mga tindahan.
Atol sa maong kalihokan, gipahinumdoman sa kapulisan ang mga tag-iya sa tindahan ug mga retailer nga legal lamang nga mga produktong tabako ang angay ibaligya. Gihatagan usab sila og pahimangno bahin sa kamahinungdanon sa pagsunod sa mga balaod ug regulasyon aron malikayan ang pagbaligya ug pag-apod-apod sa mga ilegal nga sigarilyo.
Pinaagi niini, tumong sa Matalam MPS nga mapalambo ang responsable nga pagnegosyo, mapugngan ang pagsulod ug pagdaghan sa mga ilegal nga produkto sa merkado ug masiguro nga ang mga negosyante nagsunod sa gitakdang mga regulasyon. Giawhag usab ang mga retailer nga makigtambayayong sa kapulisan ug mahimong responsable sa mga produktong ilang gipamaligya.
