Nadakpan sa hiniusang operasyon sa mga otoridad ang usa ka mag-uuma human makumpiskar sa iyang balay ang unom ka nagkalainlaing armas ug gatusan ka bala sa Barangay Doroluman, Arakan, Cotabato niadtong Nobyembre 5, 2026.
Gipatuman sa CIDG North Cotabato PFU, Arakan Municipal Police Station ug 1st CPMFC ang search warrant batok sa suspek. Nakuha sa operasyon ang usa ka .45 caliber pistol, duha ka 12-gauge shotgun, usa ka .38 caliber revolver ug duha ka PCP airgun.
Nakumpiskar usab ang 280 ka bala nga 5.56mm, walo ka M16 magazine, 18 ka bala nga .45 caliber ug nagkalainlaing tactical gear. Ang operasyon gihimo ubos sa Search Warrant Number SW KID 1112-2026. Gipasalig ni CPPO Provincial Director PCol. Ramel B. Hojilla nga ipadayon ang ilang kampanya batok sa mga loose firearms aron masiguro ang kaluwasan sa komunidad.
Sa pagkakaron, anaa na sa kustodiya sa kapulisan ang suspek samtang giandam ang kasong paglapas sa Republic Act 10591 o Comprehensive Firearms and Ammunition Regulation Act.
Photo courtesy: PRO 12
