Patay ang usa ka lalaki human gipusil sa wala pa mailhing suspek samtang natulog sa duyan gawas sa iyang gipuy-an sa Purok Millionaires Village, Olarte, Barangay Labangal, General Santos City, alas 9:00 sa gabii, Nobyembre 5, 2026.
Giila ang biktima nga si Junior Ayob Bustillo, alyas “ Dodz o Dodong Buta,” hamtong na ang edad ug lumad nga taga-Talayan, Maguindanao del Sur.
Base sa inisyal nga imbestigasyon, kalit nga miabot ang suspek ug gipusil ang biktima nga natulog niadtong higayona sa iyang duyan, hinungdan sa daghang samad pinusilan sa nagkadaiyang bahin sa iyang lawas ug sa iyang dihang kamatayon.
Human sa pagpamusil, mikalagiw ang suspek sakay sa motorsiklo padulong sa wala mahibalhing direksyon. Padayon pang gisubay sa kapulisan ang pagkatawo sa suspek ug ang posibleng motibo sa krimen.
