Gipalig-on sa South Cotabato Police Provincial Office o SCPPO ang ilang mga operasyon batok sa ilegal nga droga, armas nga walay tukmang lisensya ug puslit nga sigarilyo sa nagkadaiyang lugar sa probinsya karong Nobyembre 5, 2026.
Lakip sa ilang mga nahimong kalampusan ang pagpatuman sa search warrant nga miresulta sa pagkasikop sa usa ka tawo tungod sa giingong kalambigitan niini sa ilegal nga droga ug armas.
Gawas niini, pipila usab ka armas nga walay lisensya ug expired na ang lisensya ang boluntaryong gitugyan sa mga tag-iya ngadto sa kapulisan alang sa hustong pagtago. Kabahin kini sa OPLAN KATOK ug kampanya batok sa mga armas nga walay tukmang lisensya.
Nagpatuman usab ang kapulisan og mga inspeksyon sa mga tindahan aron masuta ang pagbaligya sa mga sigarilyong ilegal nga gipasulod sa nasud, uban sa tabang sa mga hingtungdang opisina sa lokal nga pangagamhanan.
Dugang pa niini, adunay laing tawo nga nasikop atol sa anti-illegal drug patrol operation tungod sa giingong pagpanag-iya og ilegal nga droga. Nagpadayon usab ang kapulisan sa ubang mga kalihokan alang sa pagpanalipod sa kinaiyahan ug kaluwasan sa katawhan.
Photo courtesy: SCPPO
