Nadakpan sa kapulisan ug Philippine Drug Enforcement Agency o PDEA Region 12 ang usa ka 21-anyos nga target-listed drug personality atol sa buy-bust operation sa Purok 7, Barangay Santo Niño, Apopong, General Santos City, alas 11:52 sa gabii niadtong Setyembre 18, 2026.
Gipangulohan sa PDEA RO12 Regional Special Enforcement Team ang operasyon, uban sa koordinasyon sa PDEA RO12 Sarangani-Gensan Provincial Office ug General Santos City Police Office–Police Station 2.
Ang nadakpan giila lamang sa alyas nga “Karl,” usa ka supermarket bagger ug residente sa maong barangay. Narekober gikan kaniya ang lima ka self-sealing transparent plastic bags nga adunay gituohang uga nga dahon, liso ug tukog sa marijuana, nga adunay gibanabanang standard value nga 40,464 pesos.
Narekober usab sa operasyon ang buy-bust money, usa ka cellphone, digital weighing scale, usa ka rolyo sa zip-lock transparent plastic cellophane ug usa ka brown tray nga adunay nagkalain-laing sticker. Atubangon sa suspek ang kasong paglapas sa Article II sa Republic Act 9165 o Comprehensive Dangerous Drugs Act of 2002.
Photo courtesy: PDEA 12
