Nakigpartner ang Social Security System (SSS) Pagadian sa mga barangay official sa paglunsad sa Offsite E-Center aron daghan pang miyembro ang posibleng matabangan bisan anaa lang diha sa mga kabaranggayan.
Matud ni Irene Laxamana, Acting Head sa SSS Mindanao West Division, pinaagi niini mas mapaduol ngadto sa mga komunidad ang mga online nga serbisyo sa SSS, ilabina alang sa mga miyembro nga dili dayon makabisita sa SSS branch.
Tumong matud pa sa Offsite E-Center nga makatabang sa mga miyembro sa pag-access sa mga digital service sa SSS, sama sa pagkuha og impormasyon ug uban pang transaksyon nga mahimo pinaagi sa online platforms.
Sumala ni Laxamana, importante ang pakigtambayayong sa mga barangay aron mas daghang miyembro ang maabot ug matudloan sa husto nga paggamit sa mga digital nga serbisyo.
Pinaagi sa maong inisyatiba, gilauman nga mas mapadali ug mapahapsay ang pagserbisyo sa SSS, samtang mapaduol niini ang mga serbisyo ngadto mismo sa mga barangay.
