Patay ang usa ka 29-anyos nga babaye human gipusil sa duha ka wala mailhing mga indibidwal nga gikatahong riding in tandem sa Barangay Upper Sang-an, Labangan, Zamboanga del Sur, alas 6:36 sa gabii niadtong Setyembre 19, 2026.
Base sa inisyal nga imbestigasyon sa Labangan Municipal Police Station, sakay sa iyang motorsiklo ang biktima ug gikan sa Pagadian City padulong na unta sa ilang panimalay dihang gisundan siya sa mga suspetsado.
Giduol ug gitaparan sa mga suspetsado ang biktima, diin gipusil siya sa nakaangkas nga suspetsado sa makadaghang higayon. Dali siyang gidala sa Manupac Doctor’s Hospital sa Barangay New Labangan alang sa pag-atiman, apan wala na maluwas ug gideklarar nga patay.
Human sa pagpamusil, misibat ang mga suspetsado padulong sa direksyon sa Pagadian City. Padayon karon ang imbestigasyon sa kapulisan aron mahibal-an ang motibo sa pagpamusil ug mailhan ang mga responsable.
Nakigkoordinar usab ang Labangan Municipal Police Station sa Pagadian City Police Station alang sa CCTV backtracking, nga mahimong makatabang sa pag-ila ug pagsikop sa mga suspetsado.
Photo courtesy: WSIU
