Gitan-aw sa kapulisan sa Labangan Municipal Police Station nga posibleng may kalabutan sa rido o panagbangi tali sa pamilya ang pagpamusil nga natala sa Labangan, Zamboanga del Sur, niadtong adlaw nga Sabado, Septyembre 19, 2026.
Kini subay sa gibutyag ni Zamboanga del Sur Police Provincial Office (ZSPPO) Provincial Director PCOL Bonifacio Arañas Jr., atol sa pakighinabi sa Juander Radyo Pagadian News Team kagahapon sa buntag, Setyembre 21, 2026.
Segun ni PCOL. Arañas, bisan aduna nay inisyal nga gisundang motibo ang kapulisan, apan padayon gihapon ilang paghimo ug mas lawom nga imbestigasyon aron hingpit nga mapapanubag ang duha ka mga suspetsado nga nihimo sa pagpamusil-patay sa 29 anyos nga babaye.
Gihangyo usab ni PCOL Arañas ang mga hingtungdang pamilya nga dili na palapdon ang panagbangi sulod sa pamilya ug ireport sa otoridad ang bisan unsang panaglalis aron malikayan ang susama pang mga insidente.
Samtang, gihupay usab ni PCOL. Arañas ang kabalaka sa publiko ug gipasalig nga i-intensify pa ang police checkpoint sa maong lugar aron mapugngan ang posible pang mga shooting incident nga makahatag kahadlok sa publiko.
