Dakpan ang 27 ka indibidwal atol sa usa ka joint law enforcement operation nga gipangulohan sa Bureau of Internal Revenue (BIR) didto sa Barangay Salvacion, Palo, Leyte niadtong Setyembre 20, 2026.
Sumala sa report, ang operasyon gipangulohan sa BIR ubos ni Ismaelito T. Daffon, Chief Revenue Officer II, kauban ang National Bureau of Investigation Regional Office 8 (NBI-8), Palo Municipal Police Station, Police Intelligence Unit sa LPPO, Philippine Drug Enforcement Agency 8 ug Philippine Coast Guard. Lakip sa mga nadakpan ang branch manager, mga teller ug empleyado sa Leyte Recreational Amusement Complex (LRAC).
Giatubang sa mga nadakpan ang alegasyon sa paglapas sa Sections 238 ug 264 sa National Internal Revenue Code (NIRC), nga giamyendahan, nga may kalabotan sa mga kinahanglanon sa buhis ug invoicing, ingon man ang giingong paglapas sa Presidential Decree No. 449 o Cockfighting Law of 1974 ug Presidential Decree No. 1602, nga nagtakda og mas bug-at nga silot batok sa illegal gambling.
Atol sa operasyon, gipahibalo sa mga operatiba ang mga nadakpan sa hinungdan sa ilang pag-aresto ug gibasa kanila ang ilang mga katungod ubos sa Konstitusyon gamit ang pinulongan nga ilang nasabtan. Gigamit usab sa mga operatiba ang alternatibong recording devices subay sa mga lagda ug pamaagi.
Human sa operasyon, gidala ang 27 ka nadakpan sa NBI-8 alang sa dokumentasyon ug hustong disposisyon sa ilang mga kaso.
Photo courtesy: PNP LPPO
