Miabot sa 4,832 ka kilo nga basura ang nakolekta sa Environmental Management Bureau Region XI o EMB XI atol sa coastal cleanup nga gipahigayon isip kabahin sa International Coastal Cleanup sa Seaside 2, Barangay Matina Aplaya, Davao City. Lakip sa nakolekta ang mga plastic bag, botelya ug taklob, wrappers, sachets, sinina ug footwear.
Miapil sa kalihukan ang 852 ka boluntaryo gikan sa City Government of Davao, Barangay Matina Aplaya ug 92 ka pribadong grupo ug organisasyon, diin gilimpyohan ang kapin 804 metros nga baybayon nga adunay gibanabanang 8,302 square meters nga area ug nakatigom og 396 ka sako sa basura.
Gipasiugda ni EMB XI Regional Director Alnulfo M. Alvarez nga dili lamang kutob sa coastal cleanup ang responsibilidad sa pag-atiman sa kinaiyahan.
Matud niya, importante nga ipadayon sa matag usa ang hustong paglabay sa basura ug pagpakunhod sa paggamit sa mga butang nga mahimong basura bisan human sa mga kalihukan sa pagpanglimpyo.
