Nagpanawagan ang Police Regional Office 12 sa mga ginikanan nga mangin aktibo sa pagbantay kag paggiyahan ang ila mga kabataan sa paggamit sang social media.
Ini matapos nga ginrescue sang Isulan Municipal Police Station, kaupod ang Sultan Kudarat Cyber Response Team, Regional Anti-Cybercrime Unit 12 kag Municipal Social Welfare and Development Office, ang isa ka 16-anyos nga menor-de-edad sa Barangay Kalawag 1, Isulan, Sultan Kudarat sang September 19, 2026.
Ang menor gin-alegar nga naglapas sa Article 282 sang Revised Penal Code ukon Grave Threats, may kaangtanan sa Cybercrime Prevention Act. Suno sa otoridad, ginhimo sang menor ang mga video para sa entertainment kag wala sang intensyon nga magpanghadlok ukon magpatuman sang iya mga ginhambal. Wala man sang nakita nga indikasyon sang radicalization ukon violent extremist activity.
Ginturn-over ang menor sa iya mga ginikanan ukon guardian para sa counseling kag psychosocial intervention. Nagpanawagan si PRO-12 Regional Director PBGen Alan B. Manibog sa mga ginikanan nga bantayan ang paggamit sang social media sang ila mga kabataan, istoryahon sila, kag tudluan sang responsable nga paggamit sini.
