Miabot sa 1,027 ka lungsod ug munisipalidad ang hingpit o bahin nga naglakip sa disaster ug climate resilience initiatives sa ilang Comprehensive Development Plans o CDPs, sumala sa Department of the Interior and Local Government o DILG. Matod sa DILG, ang paglakip sa disaster risk reduction ug climate change adaptation o DRR-CCA sa development plans makatabang sa mga lokal nga pangagamhanan sa pag-ila sa mga risgo ug kahuyang sa ilang lugar ug paghubad niini ngadto sa konkretong mga programa ug proyekto.
Sa 1,348 ka lungsod ug munisipalidad nga adunay aktibong CDP, 1,299 ang gisusi sa DILG. Gikan niini, 1,027 ang nakitang hingpit o bahin nga risk-informed, samtang 272 ang wala pa nakabase sa risk assessment. Padayon usab ang DILG sa paghatag og policy guidance ug technical assistance sa mga LGU sa paghimo ug pag-update sa ilang CDP ug Local Development Investment Program o LDIP.
Tumong sa mga lakang nga mapalig-on ang kapasidad sa mga komunidad sa pagpangandam ug pagtubag sa mga kalamidad ug climate-related hazards. Nagpadayon usab ang technical assistance alang sa mga LGU nga wala pa makatuman sa mga kinahanglanon alang sa CDP, uban sa pagtinabangay sa ubang development partners.
Photo courtesy: Synergy
